تامر حسني: “دخلت مستشفيات في نص السنة ومبحبش أتكلم عن كده”
كتبت: هدى الفقى
وجه النجم تامر حسني رسالة مؤثرة لجمهوره عبر صفحته الرسمية على “فيسبوك”، تحدث فيها عن كواليس ألبومه الجديد “لينا ميعاد”، الذي طرح مؤخرًا وحقق تفاعلًا واسعًا، خاصة أغنية “الذوق العالي” بمشاركة الفنان الكبير محمد منير، والتي تصدرت التريند منذ اليوم الأول.
وقال تامر:
“حابب أستغل اللحظة الجميلة دي، وأقولكم إن أغنية (الذوق العالي) مع الملك محمد منير بقت تريند عام رقم واحد، وكل أغاني ألبوم (لينا ميعاد) موجودة في التريند. عايز أحكيلكم حاجة من قلبي… عشان أوصل للمرحلة دي، مشيت مشوار طويل جدًا. قريت كل تعليقاتكم، السلبية قبل الإيجابية، لأنكم بتحبوني وأنا بقدّر ده جدًا. وده خلاني أوعد نفسي إني أفرحكم وأخليكم فخورين بالمجهود اللي عملته.”
وأضاف:
“كنت حاطط في بالي ذكرياتكم اللي ارتبطت بأغانيّ، وده خلاني أشتغل بكل طاقتي. الحقيقة، تعبت جدًا، لدرجة إني دخلت مستشفيات في نص السنة، لكن عمري ما كنت بحب أتكلم أو أنشر أخبار زي دي. أنا واحد منكم، وبحبكم بجد.”
وتابع تامر حديثه بشفافية:
“عارف إن مش كل ألبوماتي كانت عند توقعاتكم، وفي ألبومات تانية بقت علامات في حياتكم، وده طبيعي. لكن كنت دايمًا حاطط في دماغي ألبوم (عيش بشوقك)، وحاسس إنه تحدي أعدّيه وأتفوق عليه.”
واستطرد قائلاً:
“فضلت أدرس السوق الغنائي وأفهم التغير في أنماط الموسيقى، وباحترم كل الفنانين اللي نجحوا في تقديم الجديد. اشتغلت على تطوير أدائي، وقعدت سنتين بذاكر جوه الاستوديو مع مهندسين صوت، واشتغلت مع موزعين وملحنين وشعراء بكل حماس. وأحيانًا زعلوا مني من كتر التعديلات، لكن دلوقتي فخورين بالشغل وبيشكروكم على كلامكم الحلو اللي وصل لهم.”
وختم تامر رسالته بقوله:
“أنا اشتغلت على الألبوم ده بعناد وحب كبير ليكم، عشان يعجبكم كلكم. عارف إن دايمًا في تفاوت في الأذواق، لكن الأهم إنكم حسيتم بتعبي والمجهود اللي بذلته سواء في الصوت أو الصورة. بشكركم من قلبي، وبشكر كل حد انتقدني بحب، وكل حد نصحني، وبقولكم أنا فعلاً تعبت عشانكم. وكنت حابب أكون واجهة موسيقية جميلة تمثل مصر، خاصة إني بغني في دول كتير حول العالم كمطرب مصري عربي.”
واختتم قائلًا:
“شكرًا شركة TH على إنتاج ألبوم محترم وكامل. شكرًا لكل صنّاع الألبوم… وشكرًا ليكم، أغلى جمهور. ربنا يفرحكم زي ما فرحتوني بكلامكم الجميل.”
